A. H. Sahu Khan
| Dr Abdul Habib Sahu-Khan | |
|---|---|
| Janam | 8 June 1918 Suva, Fiji |
| Maut | 29 August 2007 Sydney, Australia |
| Ghar | Suva, Lautoka, Sydney |
| Citizenship | Fiji Islander, Australian |
| Jaati | Hindustani |
| Citizen | Fiji Islander, Australian |
| Parrhai | M.B., Ch.B |
| Parrhai ke jagha | Otago University Medical School, Dunedin |
| Kaam | Doctor |
| Kaam ke saal | 1945 - 2007 |
| Home town | Suva, Lautoka, Sydney |
| Jaana jaawe hae | Legislative Council ke member 1957 - 1963 |
| Padwi | Doctor |
| Board ke member | South Pacific khels |
| Dharam | Muslim (Ahmadiyya) |
| Aurat/ Admii | Chand Bibi |
| Awards | M.B.E |
Dr Abdul Habib Sahu-Khan M.B.E., M.B., Ch.B (N.Z) (8 June 1918 – 29 August 2007), Fiji me janam le waala pahila Hindustani doctor rahaa. Uu Fiji aur Australia me dher samaj sewak aur dharmic sanstha ke aapan yogdaan diis rahaa. Uu aur uske palwaar Ahmadiyya Anjuman Ishaat-I-Islam ke Fiji me khaas member rahin aur Sydney me Ahmadiyya Anjuman Ishaat-I-Islam ke bhi suruu kare waala pahila admii rahaa. Sahu Khan ke South Pacific Games ke suruu kare khatir bhi jaana jaawe hae. Uu Fiji Ke Legislative Council ke nominated member aur Nadi Township board ke Chairman bhi rahaa.
Bachpan ke din
[badlo | source ke badlo]Sahu Khan ke janam Suva, Fiji me 8 June 1918 me bhais rahaa. Uske palwaar Fiji ke Ahmadiyya Anjuman Ishaat-I-Islam ke khaas leader rahin. Uu aapan Primary aur Secondary ke sikchha Fiji ke dher school me paais jisme Lautoka ke Natabua High School bhi rahaa. 1934 me uu New Zealand parrhe khatir gais. Huan pahunche pe uske ii pataa lagaa ki uske University me bharti hoe se pahile dui aur saal ke high school ke parrhae kare ke parri. Uu ii dui saal ke parrhae ke nau mahina me khalaas kar ke Otago University Medical School, Dunedin me doctor ke parrhae suruu kar diis.
Jab World War II suruu bhais tab uu New Zealand Armed Services Medical Corps me bharti hoe gais kahe ki uu ii biswas karat rahaa ki agar New Zealand uske parrhae khatir achchhaa hae tab uske khatir uske larre ke bhi chaahi. Larraai ke baad New Zealand ke sarkar uske dui Service Medals diis. New Zealand ke kuchh barraa Public Hospital, jaise ki Wellington, Waikato, Rotorua,Greenlane aur Auckland Public, me kaam kare ke baad uu September 1946 me Fiji lautis. On 6 October 1946 me Suva City Town Hall me uske swagat karaa gais jisme uu uu logan se Fiji ke Pearl of the Pacific banae ke khatir kaam kare ke madat maangis aur aapan Service to Mankind suruu karis. Uu Fiji me paida bhias pahila Hindustani doctor rahaa.
Samaj sewa
[badlo | source ke badlo]Sahu Khan chhota se inasaan ke madat kare khatir aapan jindagi bitae ke sochis rahaa aur jab uu doctor ban gais tab uu logan se kamti ke kamti feees liis aur garib aur buddha log ke muft me treat karis. Jab Fiji me dawai nai milat rahaa tab uu iske Sydney se import karat rahaa, nai to basic ingredients ke import kar ke uske Fiji me banae ke cost price me bechat rahaa.
Uske Fiji Medical School ke part time lecturer aur senior medical students ke external examiner bhi banawa gais rahaa jiske khatir uske kuchh paisa nai milat rahaa. Uu Samabula Anti Tuberculosis Committee me join hoe ke ek campaign suruu karis jisse rasta aur gutter ke safaa rakkhaa jaawe, garda waala rasta ke tarseal karaa jaawe aur logan ke khaanse aur thuuke ke kaaranbimaari faile ke baare me samjhaes, jisse ke TB pe rok lagawa jaawe sake. Baad me Dr Sahu-Khan ke Board of Elderly and Destitute ke Chaerman banawa gais.
1952 me uu Lautoka gais aur uske Natabua High School ke Former Students ke President chuna gias aur school ke Board of Governors ke Chaerman bhi rahaa. Uske Western Education Council aur Central Education Advisory Council for Fiji ke member bhi banawa gais rahaa. Uu Crippled Children’s Society bhi suruu karis. Uu Lautoka ke Rifle Range ke log ke pipe waala paani dewae me bhi madat karis aur CSR ke madat se ek kindergarten bhi banwais.
Dr Sahu-Khan, Lautoka Hospital ke banae ke time ek non government medical advisor rahaa aur Western Region Library ke banwae ke suruu karis, Lautoka Primary School ke bhi suru karis. Uu Hindu logan ke Ram Leela kare ke kharir ground ke parbhand karis aur ek crematorium ke bhi banwais.
South Pacific khels
[badlo | source ke badlo]1959 me Dr Sahu-Khan ke Fiji ke dui aur representatives ke saathe Rabaul in Papua New Guinea me South Pacific Conference me hissa lewe khatir bheja gais jahan pe uu South Pacific khels ke prathao rakkhis. Pahila South PAcific khels, Suva, Fiji me August -September 1963 me khela gais aur iske opening ceremony me uu ek mehmaan rahaa. Chaalis saal ke baad, 2003 me Dr aur Mrs Sahu-Khan Fiji me 10th South Pacific khels me honoured guest rahin. Ii khel ke hae chaar saal khela jaawe hae aur coinceidentally uske maut ke time ii khele chalar rahaa aur sab khilaarri aur spectators ek minute ke maun dhaaran kare rahin.[1]
Politics me
[badlo | source ke badlo]1967 me jab Nadi Township Board khatir pahila election bhais rahaa tab Sahu Khan ke uske pahila Chaerman chuna gais rahaa.[2] 1957 me, A. R. Manu ke maut ke kaaran, Sahu Khan ke Governor Legislative Council me nominate karis 1959 me uske Governor Legislative me 1963 talak nominate karis jisme uu Finance Committee ke member bhi rahaa. 1961 me jab nawaa constitution ke uppar debate howat rahaa, tab Sahu Khan ek alag Muslim member khatir argue karis, ii bol ke ke Fiji me ek Musulman ke Indian roll me kabhi nai chuna jaai.[3] 1962 me Dr Sahu-Khan ke Rani Medal of the British Empire diis.
Baad ke jindagi
[badlo | source ke badlo]1963 me uu Australia migrate hoe gais aur Sudney me rahe lagaa. Uu huan pe Ahmadiyya Anjuman Ishaat-I-Islam ke kaam jaari rakkhis aur wakiili bhi karis. Uske maut Sydney me 29 August 2007 me bhais. Uu aapan pichchhe aapan aurat, Mrs Chand Bibi Sahu-Khan, chaar larrka, ek larrki aur aath grandchildren chorr gais hae.[4]
References
[badlo | source ke badlo]- ↑ "South Pacific khels Fiji". Archived 2007-02-17 at the Wayback Machine
- ↑ Nadi Town Council - HistoryTemplate:Fix/category[dead link]
- ↑ Fiji by Dr Brij lal
- ↑ BASHSHAARTemplate:Fix/category[dead link]