Ayodhya Prasad, Fiji ke ek master, trade union ke neta aur politician rahaa. Uu 1937 me Fiji me ganna ke kisan ke pahila union, Kisan Sangh, ke suruu karis rahaa, jon ki 1940 me kisan log ke pahila dafe ganna ke ek contract dewais rahaa. Kisan Sangh ke dher support ke kaaran, Kisan Sangh ke taraf se kharraa karaa gais candidate 1937, 1940 aur 1950 me Legislative Council ke khatir ke election ke jiitis. Prasad, apne bhi 1953 aur 1956 me Legislative Council ke election me jiit ke Legislative Council me rahaa. 1941 me A. D. Patel, ke ek duusra union suruu kare ke kaaran Prasad aur Patel me ganna ke contract khatir aur Legiskative Council ke election khatir dusmani bhais. Uu kisan log ke karjaa se bachae ke khatir cooporative dukaan bhi khole ke kosis karis rahaa. Uske Alliance Party ke suruu kare me bhi haath rahaa aur uu ek party, National Congress of Fiji, ke suruu karis rahaa, jisse ki Hindustani log Alliance Party me duusra jaati ke sathe barabar rahe lekin ii nai hoe paais jab Vijay R. Singh, Indian Alliance suruu kar ke Alliance Party me Hindustani ke leader banaa. (aur...)
Aap janta hai...
Ratu Cakobau
1875 ke measles epidemic, jisme 20% Kaiviti logan mar gae rahin, ke Fiji me failae waala, Ratu Cakobau aur uske dui larrka logan rahin jon ki March 1875 me Sydney se ghuum ke lauta rahin.
1879 se lae ke 1916 tak, 42 jahaaj, 87 trip me 60,553 girmitya logan ke lae ke Fiji se aais rahaa. Isme se 45,439 log Calcutta se aur 15,114 log Madras se jahaaj me charrhin rahaa.
Fiji ke Legislative Council ke pahila Hindustani member Badri Maharaj rahaa, jiske Governor nominate karis rahaa aur jon 1917 - 1923 aur 1926 - 1929 tak Council ke member rahaa.
Fiji me pahila football competition Nasau Park, Levuka me 1924 me, Cession ke golden jublee celebrate kare ke time, chhe Kaiviti team ke biich me Ricarnie Cup khatir, khela gais rahaa.
Fiji ke Hindustani ke army me join kare ke khatir, 1934 me Indian Platoon banawa gais rahaa lekin iske 1940 me disband kar dewa gais rahaa.
Royal Air Force ke khatir fighter plane kharide ke khatir, 1943 me ek Fighter Fund suruu karaa gais rahaa, aur ii paisa se nau fighter aur paanch bomber kharida gais rahaa. Ek fighter ke naam Fiji Indian Fighter rahaa.
Fiji Trade Union Congress se pahile Ami Chandra, 1950s me Fiji Industrial Workers Congress suruu karis rahaa.
Fiji ke 1997 ke constitution me English aur Kaiviti ke saathe Hindustani ke Fiji ke official language banawa gais rahaa.
9 May - Fiji ke pichhlaa Prime Minister, Frank Bainimarama, aur suspended Commissioner of Police, Sitiveni Qiliho, ke "Abuse of Office" ke khatir 12 mahina talak jail karaa gais..
6 February – Fiji ke pichhlaa Prime Minister, Frank Bainimarama, Attorney General, Aiyaz Sayed-Khaiyum aur Health Minister, Neil Sharma ke arrest kar ke raat bhar jail me rakkhaa gais rahaa. Duusre din tiino ke "Abuse of Office" ke khatir charge kar ke bail pe chhorr diya gais.
'
Aaj se sau saal pahile, 1924 me...
Ii saal Fiji me Hindustani ke birth rate 34.32 per thousand aur Kaiviti ke birth rate 34.42 per rahaa, lekin Hindustani ke death rate 5.80 per thousand aur Kaiviti ke death rate 22.70 per rahaa.
Fiji me ek dui-bhasa waala newspaper, Fiji Samachar, Hindi aur English me chhaape ke suruu karis. Ii newspaper ke Publisher aur Editor Ram Singh aur Vishnu Deo rahin.
Reverend A. W. MacMillan, India se aais aur ek monthly newspaper called, Bharat Putra ke suruu karis jisme ke newsa sarkari newspaper Raj Doot se lewa gais rahaa.
Indian Reform League ke suruu karaa gais, jab Suva Y.M.C.A. Hindustani log ke le se manaa kar diis. Iske suruu kare waale parrha likha Hindustani aur Sarkari clerk rahin, jaise ki M. S. Buksh, Santa Singh Chowla, John F. Grant, Ilahi Ramzan, aur R. N. Deoki.
Sewak Masih, jon ki Toorak Boys School ke teacher rahaa, ke leadership ke niche Methodist Teachers Association ke suruu karaa gais. Iske member jaada kar ke Suva and Rewa ke rahin.
30 January – Fiji ke hindustani log ek meeting kar ke Residential Tax ordinance (poll-tax) jisse sab admii log, jon 18 se 60 saal ke umar ke rahin, pe ek pound ($2) ke tax lagaawa gais rahaa.
12 July – New South Wales ke Methodist Church, paisa batore ke suruu karis jisse Ba me Hindustani aurat ke khatir ek aspataal banaawa jaae sake. Ii aspataal maternity aur general hospital ke saathe Hindustani midwives aur nurses ke train karii
December – Suva ke aas paas ke Sikh log, Guru Nanak ke birthday, Samabula me banaa nawaa Gurudwara me celebrate karin. Iske agwai Kuldeep Singh karis rahaa.
20 December – S. S. Sutlej repatriated Hindustani log ke lae ke India khatir chhorris, jisme se 588 Calcutta me aur 464 Madras me utrin. Saal bhar me 1,022 Hindustani log ke repatriate karaa gais.
Ongo (Scientific naam: Sphyraena barracuda, English: Barracuda, Kaiviti: Ogo) ek rakam ke machhri hai jon ki samundar me pawa jaae hai. Ii 6 feet tak lamba rahe sake hai aur iske lage bahut tagatwar jaw hai.
