Wikipedia:Aaj ke featured article/September 2008
Aaj ke featured article ke archive
September 2008 - October 2008 - November 2008 - December 2008
Aaj Sanichar, 23 Navambar, 2024 hai. Abhi ke time 01:26 hai
- September 22
Totaram Sanadhya (1876 - 1947) Fiji ke Hindustani ke adhikar khatir maang kare waala pahila admi rahaa. Uske dhoka se bharti kar ke girmit me India se Fiji lawa gais rahaa. Uu 1893 me Fiji pahuchis aur paanch saal ke girmit kaatis lekin aapan adhikaar ke khaatir larrai karte rahis. Girmit khalaas kare ke baad, Sanadhya aapan kheti suruu karis aur sanghe sanghe pandit ke kaam bhi karis. Uu duusra Hindustani log ke madat hardam karat rahaa aur India se bhi madat le ke kosis karis. 1914 me uu India laut gais aur aapan experience ke baare me ek book, Mere Fiji Desh me Ikkis Varsh, likhis. Ii book ke parr ke India me Fiji ke prastithi ke baare sab log ke jaankari mila. (aur...)
- September 23
Manilal Maganlal Doctor (28 July 1881 - 8 January 1956), Fiji me practice kare waala pahila Hindustani wakiil rahaa. Manilal ke janam Baroda, India me bhais rahaa, lekin Fiji aae se pahile uu Mauritius me kaam karat rahaa. Totaram Sanadhya ke kosis aur Mahatma Gandhi ke barrhawa ke baad, uu 1912 me Fiji aais. Uu bahut din tak Fiji me Hindustani ke adhikar khatir larris, ek newspaper, Indian Settler, ke chapis aur Indian Imperial Association ke suruu karis. 1916 me jab sarkar, Manilal ke jagah Badri Maharaj ke Legslative Council me nominate karis, tab Hindustani log bahut dukhi bhain. Sarkar, Manilal ke Hindustani log ke leader nai maanis aur 1920 ke strike ke organise kare ke aarop me uske Fiji se deport kar diis. Is ke baad uu Aden, Somalia aur Bihar me bhi wakiili karis lekin aapan akhri din Bombay me bitais. (aur...)
Kal ke featured article: Totaram Sanadhya
- September 24
Sadhu Vashist Muni ek Hindu parcharak rahaa jon ki India se Fiji, May 1920 me, aais rahaa. Uu Fiji ke Hindustani log ke batais uu log ke chaahi ki aapan dharam aur sanskriti pe ghamand kare. Fiji me dher jagah uu school banais aur Hindi ke sikchha ke barrhawa diis. Uske Fiji me naam barrha jab 1921 me uu Fiji ke Western District me kisan aur majduur ke harrtaal ke leader banis. Uu Fiji me ek saal se bhi kamti time tak rahis lekin admii log aur sarkar uske baare be bahut kuch nai jaanat rahin. Bola jae hai ke uu dher jagha ek dafe pahuch jaat rahaa. March 1921 me sarkar uske deport kar this, ii bol ke ki uu Mahatma Gandhi ke jaasus rahaa. Uske deport kare ke baad, Suva ke Government House, bijli gire ke kaaran, jar gais aur janata log me uske chamatkaar kare ke taagat me biswas aur barrhaa. (aur...)
Pahile dui din ke featured article: Manilal Doctor – Totaram Sanadhya
- September 25
Badri Maharaj, Fiji ke Legislative Council ke pahila Hindustani member rahaa. Uske Fiji ke Governor 1917 - 1923 aur 1926 - 1929 tak Council me Hindustani log ke represent kare khatir nominate karis rahaa lekin janta log isse khush nai rahin aur Manilal Doctor ke aapan leader maanat rahin. Uu 1920 ke strike ke virod karis rahaa aur ii nai mangat rahaa ki Hindustani log India laut jaae. Uu mangat rahaa ke Kaiviti log ke rakam bhi ek Indian Administration suruu karaa jaae jon ki panchayat ke rakam rahe. Uu chhota larrkan ke saadi ke virod karis aur sikchha me bahut yogdaan diis. Poll tax ke virod me uu 1923 me Council se resign kar diis lekin uske 1926 me fir se nominate kar dewa gais rahaa. Uu Fiji me Hindustani log khatir pahila school bhi banais rahaa aur Arya Samaj ke support karat rahaa. (aur...)
Pichhile tiin din ke featured article: Vashist Muni – Manilal Doctor – Totaram Sanadhya
- September 26
Pandit Vishnu Deo (OBE) (17 July 1900 - 7 May 1968), Fiji ke Hindustani log ke khatir, Fiji me paida bhae, pahila leader rahaa. Uu 22 saal tak Fiji ke Legislative Council ke member rahaa aur ekko election nai haris. Uu Fiji me common roll election ke mange waala pahila admii rahaa. Deo, dharam aur sikchha ke khatir, bahut yogdaan diis. Uu Arya Samag ke bhi ek leader rahaa, bahut se samaj sudharak sanstha ke suruu karis rahaa aur ek newspaper, Fiji Samachar ke sampadak bhi rahaa. 1956 me Legislative Council ke sab Hindustani member uske Executive Council khatir elect karin. Uske retire hoe ke baad Legislative Council uske aapan naam ke aage sab time khatir "Honourable" jorre ke ijaajat diis. Uu aapan position se kabhi koi faeda nai uthais aur mare ke time uske paas kuch paisa nai rahaa. (aur...)
Pichhile tiin din ke featured article: Badri Maharaj – Vashist Muni – Manilal Doctor
- September 27
Parmanand Singh (janam: 1905), Fiji ke ek politician aur businessman rahaa. Uu Fiji ke pahila Hindustani rahaaa jon ki New Zealand jaae ke parrhis. Singh uu tiin Hindustani me se ek rahaa jon ki 1929 me pahila dafe Legislative Council me Hindustani log se chuna gais rahaa. Uu khali dui hafta Council me rahha, jab ki sarkar ke common roll ke mang ke reject kare ke protest me uu Council ke boycott karr diis. Singh ek zamindar rahaa jon ki CSR se jamiin lease me le ke uske duusra Hindustani log ke lease karat rahaa. Uu dui Hindi newspaper bhi chaapis jisme se ek, Jai Fiji 1956 se 1980 tak chalaa. Uske bhaiya, Chattur Singh aur larrka, Anand Singh bhi politics me rahin. (aur...)
Pichhile tiin din ke featured article: Vishnu Deo – Badri Maharaj – Vashist Muni
- September 28
James Ranchandar Rao (jiske James Ramchandar Maharaj ke naam se bhi jaana jaat rahaa) , October 1929 me Fiji ke Legislative Council me chuna jaae waala tiin Hindustani me se ek rahaa. Rao, Eastern Indian Division khatir kharra bhais rahaa, jisme Vanua Levu, Lau aur Lomaiviti Islands rahaa aur uu aapan opponent, Khalil Sahim ke 63 - 20 votes se harais. Dui hafta baad Rao, duuno aur Hindustani member ke saathe, Council se resign kar diis jab uu logan ke prastao ki, Fiji me Hindustani logan ke common roll de ke barabri ke adhikaar dewa jaae, ke sarkaar inkaar kar diis. Rao, Levuka, Ovalau me ek theatre chalat rahaa aur Fiji me picture theatre suruu kare waala ek pahila admii rahaa. Uske larrka, Navin Maharaj, Suva City Council ke lord mayor aur Fiji ke House of Representatives ke member rahaa. (aur...)
Pichhile tiin din ke featured article: Parmanand Singh – Vishnu Deo – Badri Maharaj
- September 29
Kunwar Bachint Singh (JP,OBE) (jiske K. B. Singh ke naam se bhi jaana jaat rahaa), ke Fiji me parrhae khatir Arya Samaj 1927 me laais rahaa. Uske, Fiji me Arya Samaj ke ek leader, Vishnu Deo, se dosti ke kaaran uu Arya Samaj ke barrhawa khatir khuub kaam karis aur baad me politics me bhi chal diis. Singh ke 1932 me, Vishnu Deo ke support se, Legislative Council me chuna gais lekin uu Deo ke party ke baat nai sunis aur uske Hindustani log me support khatam hoe gais. Uu common roll ke jagah, nominated system ke support karis, Hindustani log ke second world war me sarkar ke support kare ke barrhawa karis aur apne se ek kisan sangh bhi suruu kare ke kosis karis. Sarkar uske wafaadari khatir uske 1937 se 1947 tak Legisaltive Council me nominate karis aur 1946-47 tak uske Executive Council ke member bhi banais rahaa. (aur...)
Pichhile tiin din ke featured article: James Ramchandar Rao – Parmanand Singh – Vishnu Deo
- September 26
Muniswamy Mudaliar (JP) ek Fiji ke Hindustani politician aur businessman rahaa. Uske aapan koi support nai rahaa, lekin 1932 me jab Vishnu Deo ke, Legislative Council ke election khatir, ek candidate ke jarurat parraa tab Mudaliar ke nominate kar dewa gais rahaa, ii samajh pe ki uu K. B. Singh ke ssathe common roll ke prastao rakkhi aur jab ii prastao gir jaai tab uu resign hoe jaai. Lekin uu resign nai bhais aur baad me common roll ke jagah nominated system ke support karis. Uu khali ek term tak Legislative Council me rahaa lekin uske wafaadari khatir, sarkar uske Justice of the Peace banae diis rahaa. (aur...)
Pichhile tiin din ke featured article: K. B. Singh – James Ramchandar Rao – Parmanand Singh
Aaj ke featured article ke archive
September 2008 - October 2008 - November 2008 - December 2008
Aaj Sanichar, 23 Navambar, 2024 hai. Abhi ke time 01:26 hai