Fijian Association Party

Wikipedia se

Fijian Association Party (FAP), Fiji ke ek political party rahaa. Ii party ke khaas haanth Fiji ke politica me 1990s me rahaa lekin 2001 ke election me ii aapan sab seat haar gais rahaa.

Ii party ke 1994 me Josefata Kamikamica, jon ki purana Alliance sarkar me Finance Minister rahaa, suruu karis rahaa. 1992 ke election ke baad Kamikamica, aur uske paanch aur saathi, Rabuka ke Fijian Political Party se nikal gain rahaa. FAP, 1994 ke election me paanch seat jiitis rahaa. 1996, me Kamikamica ke maut ke baad, Ratu Mara ke larrka, Finau Mara, iske leader banaa. 1998 me Fiji Labour Party (FLP) ke 1987 ke Prime Minister Timoci Bavadra ke aurat, Adi Kuini Speed iske leadership liis.

1999 ke election me FAP, Mahendra Chaudhry ke FLP ke saathe People's Coalition banais aur duusra Party ke saathe aur ii Coalition election ke jiit gais. Isme FAP 10 seat aur FLP 37 seat jiitis rahaa. Speed Prime Minister bane maangat rahii, lekin President Mara Chaudhry ke P.M. banais kaahe ki uske Party ke majority House of Representatives me rahaa. 1999 me FAP split hoe gais jab Ratu Tu'uakitau Cokanauto aur uske supporter logan Party se nikal gain.

2001 ke election hoe talak FAP ke dher member logan Laisenia Qarase ke Soqosoqo Duavata ni Lewenivanua join kar liin rahaa. FAP khaali 15 seat contest karis aur ekko nai jiitis.

June 2002 me FAP, aur tiin Party ke saathe, Fiji Democratic Party ke banais aur ii Party April 2005 me National Alliance Party of Fiji ke ek hissa hoe gais.