James Shankar Singh
| James Shankar Singh | |
|---|---|
| Janam | 1924 Ba, Fiji |
| Maut | 27 July 2014 Auckland, New Zealand |
| Ghar | Auckland, New Zealand |
| Citizenship | Fiji Citizen |
| Jaati | Hindustani |
| Citizen | Fiji Citizen |
| Kaam | Kisan, Businessman, Cabinet member |
| Kaam ke saal | 1963 - 1987 |
| Home town | Ba, Fiji |
| Jaana jaawe hae | Politician, Kisan, Businessman |
| Term | 1972 - 1982: Member for Lau-Cakaudrove Indian National Constituency, Minister for Health 1987: Member for Nasinu/Vunidawa Indian Communal Constituency |
| Party | Alliance Party National Federation Party |
| Board ke member | Ba Township Board: 1955, 1960-1963 |
| Dharam | Catholic |
| Palwaar | Pitaji: Jang Bahadur Singh Bhaiya: Uday Singh |
| Awards | Justice of Peace |
James Shankar Singh (1924 - 2014) Fiji ke ek Hindustani kisan, samaj sudharak, insurance aur travel agent, politician aur cabinet member rahaa. Uu Ratu Mara ke Alliance sarkar me ek Minister rahaa lekin 1982 me Alliance Party se resign kardiis rahaa aur 1985 me National Federation Party ke join kar liis rahaa.
Jawani ke din
[badlo | source ke badlo]James Shankar Singh ke janam Ba ke ek jaane maane palwaar me bhais rahaa. Uske pitaji, Jang Bahadur Singh, Fiji ke Hindustani log ke ek neta aur Arya Samaj ke samarthak rahaa. Uske dui bhaiya logan, Uday Singh aur James Bir Singh bhi politics me rahin. Uu aapan primary aur Seconday ke parrhai kar ke baan overseas parrhe ke khatir gais lekin aapan parrhai puura kare se pahile Fiji laut ke aae gais.
Business aur kisani
[badlo | source ke badlo]Fiji laute ke baan uu Ba town me ek insurance aur travel agency kholis. Uu samaj ke bhi dher yogdaan diis jisme Red Cross bhi rahaa. Uske khaas haanth Ba Health Centre ke barrhae me rahaa. Uu aapan palwaar ke ganna ke khet, Votua, Ba me bhi sambhalis.
Politics me
[badlo | source ke badlo]1963 ke election
[badlo | source ke badlo]Singh ke palwaar bahut din se Fiji ke Hindustani politics me rahaa aur Kisan Sangh ke samarthak rahin. Ii kaaran se 1963 ke election me uu A. D. Patel ke support kare waala umedwaar, S. M. Koya ke virod me , North Viti Levu Indian Constituency se kharaa bhais. Ek bahut karraa campaign ke baad election ke natija rahaa:
S. M. Koya 3,998 James Shankar Singh 3,480 Informal 50 Total 7,478 % voted 93.9%
Ii 1963 ke election me Hindustani seat ke khatir sab se close result rahaa aur Singh ke haare ke khaas kaaran ii rahaa ki Constituency ke uu hissa jon ki Tavua aur Rakiraki me rahaa, me uu achchhaa nai karis.
1966 ke election
[badlo | source ke badlo]1966 ke election me Hindustani logan ke nau Indian Communal seat mila aur ii kaaran se purana North Viti Levu Indian Constituency ke dui hissa me baat dewa gais. Shankar Singh ii election me North-West Viti Levu Indian Communal Constituency, jon ki khaas Ba area ke rahaa, se kharraa bhais. Ii tike uske virod me R. D. Patel, A. D. Patel ke bhaiya, rahaa aur ii for se Singh ke jie ke bhaari chance rahaa, lekin election ke natija rahaa:
R. D. Patel (Federation) 4,704 James Shankar Singh (Alliance) 4,411 % voted 94.7%
1972 aur 1977 ke election
[badlo | source ke badlo]1968 ke by-election me uu nai kharraa bhais rahaa, lekin 1972 me uske wafaadaari ke khatir Ratu mara uske sab se safe seat, Lau-Cakaudrove-Rotuma Indian National Constituency diis, jahan pe bahit kamtii Hindustano logan hae aur uske jiit ekdam sahaj se hoe gais. Ii election ke baad uske ajaad Fiji ke sarkar me Minister of Health banawa gais. Uu 1977 ke election me ii Constituency se fir se jiitis aur Indian Alliance ke neta bhi banaa
1985 ke by-election
[badlo | source ke badlo]1985 talak James Shankar Singh aapan purana dusman S. M. Koya ke saathe hoe ke National Federation Party ke join kar liis rahaa. 1985 me jab Vijay R. Singh North-Central Indian National Constituency se aapan seat se (Fiji Sugar Cane Growers Council ke Chief Executive bane ke khatir) resign kar diis tab Singh by-election me NFP ke taraf se kharraa bhais. Election ke result rahaa:
Mahendra Chaudhry (Fiji Labour Party) 7,644 James Shankar Singh (National Federation Party) 5,003 Uday Singh (Alliance Party) 7848
Ii rakam se uu appan bhaiya, Uday Singh, se ii seat haar gais.
1987 ke election
[badlo | source ke badlo]Ii election me Singh ke NFP-Labour Coalition ke taraf se ek safe seat Nasinu/Vunidawa Indian Communal dewa gais rahaa jiske uu sahaj se jiit liis. Election ke result rahaa:
Mahendra Sukhdeo (Alliance Party) 679 James Shankar Singh (NFP-Labour Coalition) 8,535
Ii election ke ek mahina baad Fiji me coup hoe gais aur Singh ke political career khalaas hoe gais.
Baad ki jindagi
[badlo | source ke badlo]Singh aapan jindagi me chhe election larris, aur uu tiin election jon ki aapan district (Ba) me larris ke haar gais lekin baaki tiin election jon ki uu huan pe larris jahan pe uske achchhaa se jaana nai jaawat rahaa, ke jiit gais.
Singh abhi Auckland, New Zealand me rahe hae.